Ciidamada ammaanka ee Ukraine ayaa sheegtay mas’uuliyadda dilka jeneraalka Igor Kirillov – taliyaha ciidamada difaaca shucaaca, kiimikada, iyo sunta noolaha ee millateriga Ruushka – oo lagu dilay caasimadda Moscow, arrintaas oo Ruushku ku tilmaamay “isku day cabsi gelin oo fashilmay.”
Wakaaladda wararka ee Reuters ayaa soo xigatay ilo ka tirsan hay’adaha ammaanka ee Ukraine in hay’adaha sirdoonka Ukraine ay fuliyeen “hawlgal gaar ah” oo lagu dilay jeneraalka Ruushka ee Igor Kirillov.
Sidoo kale, wakaaladda wararka ee AFP ayaa soo xigatay ilo ka tirsan hay’adaha ammaanka ee Ukraine oo sheegay in “weerarka bambaano ee maanta lagu qaaday Kirillov, taliyaha ciidamada difaaca shucaaca, kiimikada, iyo sunta noolaha ee ciidamada Ruushka, uu yahay hawlgal gaar ah oo ay fuliyeen hay’adaha sirdoonka Ukraine.”
Isha Ukrainian-ka ah ayaa ku tilmaamay dilkan “dhammaadka sharaf-darrada ah ee sugaya kuwa dilay dadka reer Ukraine,” isagoo intaas ku daray in “aargoosiga dambiilayaashu uu yahay wax aan laga fakan karin.”
Wakaaladda wararka ee Associated Press ayaa sheegtay in hay’adaha ammaanka ee Ukraine ay shalay, Isniintii, dacwad ku soo oogeen Kirillov oo lagu eedeeyay isticmaalka hub kiimiko oo mamnuuc ah intii lagu jiray dagaalka Ukraine, kaas oo bilowday bishii February 2022.
Hay’adda ammaanka ee Ukraine ayaa sheegtay in Kirillov uu “mas’uul ka ahaa isticmaalka ballaaran ee hubka kiimiko ee mamnuuc ah,” iyagoo sheegay in in ka badan 4800 jeer la isticmaalay rasaas kiimiko oo uu Ruushku adeegsanayey tan iyo bishii February 2022.
