Boqortooyada Sacuudiga ayaa shalay oo Jimce ah ku dhawaaqday inay Yemen siiso taageero dhaqaale iyo maaliyadeed oo cusub oo gaareysa $500 milyan.
Mas’uuliyiinta Sacuudiga ayaa faahfaahin ka bixiyay taageeradan cusub, oo ay ka mid yihiin:
$300 milyan oo deebaaji ah oo lagu shubayo Bangiga Dhexe ee Yemen si loo hagaajiyo xaaladda dhaqaale iyo maaliyadeed.
$200 milyan oo loogu talagalay daboolidda miisaaniyad-xumada.
Taageerada dhaqaale ee Sacuudiga u fidinayo Yemen waxay ujeedkeedu yahay:
Xoojinta aasaaska degganaanshaha dhaqaale, maaliyadeed iyo lacagta Yemen.
Hagaajinta xaaladda maaliyadda guud.
Kobcinta iyo dhisidda awoodda hay’adaha dowliga ah, iyo xoojinta hufnaantooda iyo maamul wanaaggooda.
Taageeridda qeybta gaarka ah si ay u hormariso koboca dhaqaalaha waara.
Abuuridda shaqooyin cusub, taasoo keenaysa in dhaqaalaha waddanku ku socdo waddo waarta oo horumarineed, kuna sii wado barnaamijyada horumarinta dhaqaalaha iyo bulshada.
Dhiniciisa, Raysal Wasaaraha Yemen ee caalamku aqoonsan yahay, Cawad Bin Mubaarak, ayaa boggiisa “X” ku sheegay in taageerada maaliyadeed ee Sacuudiga ay dowladda Yemen u suurtagelin doonto:
Bixinta mushaaraadka shaqaalaha dowladda.
Joojinta hoos u dhaca qiimaha lacagta.
Sii wadidda barnaamijka dib-u-habaynta maaliyadeed iyo maamulka.
La dagaalanka musuqmaasuqa.
Sacuudiga ayaa hore ugu deeqay shidaal si loo hawlgaliyo 80 xarumood oo koronto oo ku yaalla dhammaan gobollada Yemen, taas oo kaalin weyn ka qaadatay kor u qaadista kobaca dhaqaalaha iyo sare u qaadista waxtarka waaxyaha muhiimka ah, wax-soo-saarka, iyo adeegyada dalka.
Sidoo kale, Riyadh waxay Yemen ka fulisay 263 mashruuc iyo hindise horumarineed oo uu hirgeliyay Barnaamijka Sacuudiga ee Horumarinta iyo Dib-u-dhiska Yemen, kuwaas oo laga hirgeliyay gobollo kala duwan oo dalka ka mid ah.
Yemen waxa uu in ka badan 30 bilood ku jiray xabbad-joojin dagaal ah oo billowday ku dhawaad 10 sano ka hor, tan iyo 21-ka Sebtember 2014, markii uu dagaal ka dhex qarxay ciidamada dowladda iyo kooxda Xuutiyiinta.
Dagaalkan ayaa burburiyay inta badan waaxyaha Yemen, gaar ahaan waaxda caafimaadka, wuxuuna sababay mid ka mid ah dhibaatooyinka bani’aadamnimo ee ugu xun adduunka, sida ay sheegtay Qaramada Midoobay.
