Clement Salami, oo ah isku-duwaha Qaramada Midoobay ee gargaarka bini’aadantinimo ee Suudaan, ayaa ka digtay in dhibaatada bini’aadantinimo ee waddankaasi gaartay heerar aan horay loo arag.
Waxay ku sheegtay war-saxaafadeed in in ka badan kala bar shacabka Suudaan ay u baahan yihiin gargaar bini’aadantinimo iyo ilaalin degdeg ah, oo ay ku jiraan 16 milyan oo caruur ah, sida ay sheegtay.
Salami waxay tilmaantay in amni-darrada cunno ee Suudaan ay gaartay heerar taariikhi ah, gaar ahaan gobollada Darfur, caasimadda Khartoum, iyo gobolka Kordofaan.
Waxay sidoo kale sheegtay in, ka dib muddo ka badan 20 bilood oo dagaal ah oo u dhexeeya ciidamada Suudaan iyo xoogagga Taageerada Degdegga ah, uu Suudaan wajahayo mid ka mid ah dhibaatooyinka bini’aadantinimo ee ugu weyn adduunka.
Salami waxay ugu baaqday dhammaan dhinacyada ku dagaallamaya Suudaan inay fududeeyaan gaarsiinta gargaarka bini’aadantinimo, ayna xaqiijiyaan badbaadada howlaha gargaarka iyo shaqaalaha samafalka ee goobaha dagaalka.
Dhinaciisa, danjiraha gaarka ah ee Mareykanka ee Suudaan, Tom Pirello, ayaa sheegay in 638,000 qof oo ku sugan Suudaan ay wajahayaan macaluul, isagoo bartiisa “X” ku sheegay in in ka badan 30 milyan oo Suudaaniyiin ah ay u baahan yihiin gargaar bini’aadantinimo sababo la xiriira waxa uu ku tilmaamay falalka xoogagga Taageerada Degdegga ah iyo ciidamada Suudaan.
Danjiraha Mareykanka ee Suudaan wuxuu ku adkeystay in shacabka Suudaan ay u baahan yihiin in dagaalka la joojiyo isla markaana dhinacyada dagaallamaya ay si degdeg ah u oggolaadaan gaarsiinta gargaarka bini’aadantinimo. Waxa uu ugu baaqay bulshada caalamka in ay fiiro gaar ah u yeeshaan halista ka dhalanaysa dhibaatada bini’aadantinimo ee Suudaan.
