Muqdisho, Diseembar 17, 2024: Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, ayaa Madaxtooyada Qaranka ku qaabilay Ergayga Gaarka ah ee Dowladda Shiinaha u qaabilsan Geeska Afrika, Mudane Xue Bing, oo booqasho rasmi ah ku jooga dalka Soomaaliya.
Madaxweyne Xasan Sheekh iyo Danjire Xue Bing ayaa ka wada-hadlay xoojinta iskaashiga labada waddan ee dhinacyada amniga, dhaqaalaha, siyaasadda, diblomaasiyadda, ganacsiga iyo waxbarashada si loo kobciyo danaha ay wadaagaan Soomaaliya iyo Shiinaha.
Madaxweynaha ayaa danjiraha la wadaagay horumarka uu gaaray dalkeenna iyo fursadaha maalgashi ee ka bannaan, taas oo ay wadaagi karaan Soomaaliya iyo Shiinaha. Waxa uu xusay in Soomaaliya waqtigan u diyaar tahay la falgalidda caqabadaha iyo fursadaha isku sidkan ee ka imaan kara heer Gobol iyo kuwa caalami ah.
Dhankiisa, Danjire Xue Bing ayaa uga mahadceliyey Madaxda iyo shacabka Soomaaliyeed soo dhaweynta wanaagsan ee ay u fidiyeen isaga iyo wafdigiisa. Waxa uu bogaadiyey guulaha ay ku tallaabsatay Dowladda Federaalka ee amniga, la dagaallanka argagixisada iyo xaqiijinta nabadda iyo horumarka Geeska Afrika, taas oo ku saleysan daris wanaag, is-ixtiraam iyo nabad ku wada noolaanshaha dalalka Gobolka.
