Xuutiyiintu waxay maanta oo Axad ah ku dhawaaqeen inay beegsadeen xarun koronto oo ku taalla Koonfurta Haifa, Israa’iil, iyaga oo isticmaalaya gantaal dheereeya oo xawaare sare leh. Dhanka kale, warbaahinta ay leeyihiin Xuutiyiinta ayaa sheegtay in isbahaysiga Mareykanka iyo Ingiriisku ay duqeymo ka fuliyeen waqooyiga Yemen.
Xuutiyiintu waxay soo saareen bayaan arrintan la xiriira saacado kadib markii ciidanka Israa’iil uu sheegay in difaacooda uu soo riday gantaal ka yimid dhanka Yemen.
Afhayeenka ciidanka Xuutiyiinta, Yahya Sariic, oo hadal ka jeediyay telefishinka, ayaa sheegay in ciidamadoodu ay fuliyeen hawlgal ciidan oo lagu beegsaday xarunta korontada ee “Orot Rabin” iyaga oo isticmaalaya gantaal xawaare sare leh oo lagu magacaabo “Falastiin 2,” isagoo xaqiijiyay in hawlgalku si guul leh u fulay.
Sariic wuxuu intaas ku daray in howlgalada taageeraya Gaza ay sii socon doonaan, iyadoo la horumarinayo awoodaha milatari ee joogtada ah.
Afhayeenku wuxuu sidoo kale sheegay in “ciidamada qalabka sida” (kuwa Xuutiyiinta) ay ku hawlan yihiin horumarinta awoodahooda milatari si ay ula jaanqaadaan marxaladda hadda lagu jiro oo ay ku qasbaan Israa’iil inay joojiso gardarrada iyo in cunaqabateynta laga qaado Gaza.
Todobaadyadii la soo dhaafay, weerarada Xuutiyiinta ee gantaallada ballistic-ga iyo diyaaradaha aan duuliyaha lahayn ee Israa’iil lagu qaaday ayaa kordhay, inkastoo Yemen ay la kulantay afar duqeymo cirka ah oo Israa’iil fuliyeen intii lagu jiray toddobaadyadii la soo dhaafay.
