Afhayeenka milateriga ee kooxda Ansarullah (Xuutiyiinta), Janaraal Yaxya Sareec, ayaa ku dhawaaqay in ay soo rideen diyaarad dagaal oo nooca F-18 ah xilli ay isku dayayeen inay ka hortagaan diyaaradaha Maraykanka iyo Ingiriiska ee duqeymo ka fuliyey dalka Yemen fiidkii xalay oo Sabti ahayd.
Afhayeenku wuxuu intaas ku daray in sidoo kale ay bartilmaameedsadeen doon xambaarsan diyaarado dagaal oo ah USS Harry Truman iyo maraakiibta dagaalka ee la socotay, isaga oo sheegay inay ku guuleysteen inay fashiliyaan weerar ay Maraykanka iyo Ingiriiska ku qaadeen Yemen.
Afhayeenka milateriga ayaa mar kale ku celiyey diyaaradda kooxda Ansarullah ee ku aaddan “wax kasta oo nacasnimo ah oo Maraykanku iyo Ingiriisku ku kacaan,” wuxuuna uga digay in wax duullaan ah lagu soo qaado Yemen.
Dhanka kale, milateriga Maraykanka ayaa saaka, Axad, ku dhawaaqay in diyaarad dagaal oo nooca “F/A-18 Hornet” ah lagu soo riday si qalad ah iyada oo dul heehaabaysay Badda Cas, taasoo khasabtay in duuliyayaasha diyaaradda ay ku boodhboodaan diyaaradaha badbaadinta.
Warbixinta ayaa sheegtay in shilka uu ka dhacay xilli ay diyaaraddu fulinaysay howgal ay ku dul socotay doonka xambaarsan diyaaradaha dagaalka ee “Harry S. Truman.” Waxaa lagu sheegay in mid ka mid ah maraakiibta ilaalinaysay, gaar ahaan markabka gantaalaha ee “Gettysburg,” uu qalad ahaan ku riday diyaaradaas, taasoo burburisay.
Horey, hoggaanka dhexe ee Maraykanka (CENTCOM) ayaa ku dhawaaqay in duqeymo “sax ah” ay xalay goor dambe Sabti ahayd ku fuliyeen xarun kaydinta gantaalada iyo xarun hoggaanka iyo xakamaynta ah oo ay kooxda Ansarullah ka maamusho caasimadda Yemen ee Sanca.
