Kadib markii mucaaradka Suuriya ay si buuxda ula wareegeen magaalada Dimishiq, su’aasha ugu weyn ee bulshada ka dhex guuxeysa ayaa aheyd:Xaguu u baxsaday Bishaar Al-Asad, madaxweynihii awoodda lagaga qaaday dalka suuriya?
Warbixin ay faafisay mareegta Flightradar, oo ku takhasustay dabagalka duulimaadyada, ayaa sheegtay in diyaarad ka duushay caasimadda Dimishiq ka hor intaan mucaaradku soo gaarin caasimadda. Diyaaraddan, oo la tuhunsan yahay inuu saarnaa Bishaar Al-Asad, ayaa markii hore u jihaysatay dhanka xeebaha, halkaas oo ay deggan yihiin kooxaha Calawiyiinta ee uu kasoo jeedo. Si kastaba ha ahaatee, diyaaraddu waxay si lama filaan ah u beddeshay jihadii ay ku socotay, waxaana laga waayey raadaarada.
Dhanka kale, warbixin uu qoray Wall Street Journal ayaa sheegtay in Bishaar Al-Asad uu ka baxay Suuriya toddobaad ka hor inta aysan mucaaradku soo gaarin Dimishiq. Warbixintu waxay intaas ku dartay in qoyskiisa loo qaaday Ruushka.
Wargeyska Axios, oo soo xiganaya sarkaal Israa’iili ah, ayaa sheegay in Bishaar uu habeen barkii ka baxay Dimishiq, isagoo ku hakaday xarun milatari oo Ruushku ku leeyahay gudaha Suuriya. Halkaas ayuu diyaarad kale ka raacay, waxaana loo qaaday Ruushka.
Si kastaba, warbixino kale oo ay qoreen wargeysyo caalami ah iyo wakaalado warbaahineed ayaa tilmaamaya in weli aan si rasmi ah loo xaqiijin karin in Bishaar Al-Asad uu ka baxay Suuriya ama uu ku sugan yahay dalka dhexdiisa. Su’aasha ah “xaguu ku dambeeyay Bishaar?” ayaa weli u muuqata mid u baahan jawaab cad.
