Warbaahinta Suudaan ayaa ku warrantay in diyaaradaha dagaalka ee ciidanka Suudaan ay burburiyeen inta badan garoonka caalamiga ah ee Nayla ee gobolka Koonfurta Darfur. Dhanka kale, ugu yaraan 15 qof ayaa ku dhintay, halka 60 kale ay ku dhaawacmeen duqeyn ay fuliyeen xoogagga Taageerada Degdegga ah (RSF) oo lala beegsaday xero barakacayaal oo ku taalla magaalada Al-Fashir ee galbeedka dalka.
Wararka ka imanaya ilo ciidan iyo muwaadiniin Suudaaniyiin ah ayaa sheegay in duqeynta cirka ay burburisay qaybaha garoonka, oo ay ku jiraan dhabaha weyn ee diyaaraduhu ku degaan, munaaradda koontaroolka, iyo goob loogu talagalay jamming (isku dhexyaacinta isgaarsiinta). Duqeynta ayaa sidoo kale bartilmaameedsatay meel khaas ah oo ay isticmaali jireen howlgalka isuduwidda Midowga Afrika iyo Qaramada Midoobay ee Darfur (UNAMID), taasoo gabi ahaanba la burburiyay.
Sidoo kale, duqeynta ayaa lagu garaacay xero ay lahaayeen booliska keydka dhexe, xarunta maamulka guud ee gaadiidka, iyo xarunta wasaaradda maaliyadda, kuwaas oo loo maleynayo inay ahaayeen meelo lagu kaydiyo hubka. Arrintan ayaa sababtay qaraxyo xooggan iyo dab qaatay saacado badan.
Dhanka kale, warbixinada Suudaan ayaa sheegay in ugu yaraan 15 qof ay dhinteen, halka 60 kale ay ku dhaawacmeen, kadib markii xoogagga RSF ay madaafiic ku garaaceen xerada Zamzam oo ah goob barakacayaal iyo suuqa xoolaha ee magaalada Al-Fashir ee waqooyiga Darfur.
Bayaan kasoo baxay “Guddiyada Iska caabinta Al-Fashir” ayaa lagu yiri: “Xerada barakacayaasha ee Zamzam iyo suuqa xoolaha ee Al-Fashir oo ku yaalla gobolka waqooyiga Darfur, maanta waxaa lagu garaacay madaafiic ay fuliyeen xoogagga Taageerada Degdegga ah.”
Xafiiska guud ee barakacayaasha iyo qaxootiga Darfur ayaa sidoo kale sheegay Arbacadii subaxnimadii: “Waxaa dib u soo cusboonaaday duqeymaha ba’an ee madaafiicda lagu garaaco xerada Zamzam ee barakacayaasha, oo si ula kac ah uga imaanaya xoogagga RSF.”
Muddo 10 maalmood ah ee la soo dhaafay, duqeymaha madaafiicda ee RSF ayaa si isdaba joog ah loogu garaacay xerada Zamzam, taasoo ah tan ugu weyn ee barakacayaasha Darfur marka loo eego dadka ku nool. Arrintan waxaa cambaareeyay Qaramada Midoobay iyo ururka “Dhakhaatiirta aan xuduudda lahayn.”
Ugu yaraan 65 qof ayaa ku dhintay, boqolaal kalena waa ku dhaawacmeen, kadib markii xoogagga RSF ay shalay duqeeyeen meelo ku yaalla deegaanka Karari ee waqooyiga magaalada Omdurman. Sidoo kale, shan qof ayaa ku dhintay waqooyiga Darfur Talaadadii.
Dowladda gobolka Khartuum ayaa sheegtay in duqeyntu ay garaacday xarunta baska ee xaafadda 17, halkaasoo madfac uu haleelay bas, taasoo sababtay dhimashada 22 qof oo jirkooda u kala go’ay. Duqeynta ayaa sidoo kale saameysay suuqyo iyo xaafado kale, iyadoo loo aqoonsaday inay tahay “xasuuq bini’aadanimo oo loo geysanayo dad aan waxba galabsan.”
