Wargeyska The New York Times ee Mareykanka ayaa sheegay in warbixinno dhowaan soo baxay oo ka hadlayay kooxo diyaaradaha aan duuliyaha lahayn ee dul heehaabaya xeebta bari ee Mareykanka ay abuureen xiiso ballaaran iyo cabsi laga qabo in dagaal nooca isku-dhafka ah uu qarxo.
Wargeysku waxa uu soo xigtay mas’uuliyiin Mareykan ah – kuwaas oo aan magacyadooda la shaacin – oo sheegay in 100 ka mid ah 5,000 oo diyaaradaha aan duuliyaha lahayn ah lagu arkay halkaas, taas oo keentay in baaritaanno dheeraad ah la sameeyo. Illaa hadda lama rumaysna in midkoodna uu ahaa diyaarado basaas ah oo shisheeye.
Si kastaba ha ahaatee, The New York Times waxa ay aaminsan tahay in diyaaradaha aan duuliyaha lahayn ee la arkay dhammaadkii bishii Noofambar iyo Diseembar ee lasoo dhaafay, iyagoo dul heehaabaya saldhigyo ciidan oo ku yaalla Ingiriiska iyo Jarmalka halkaas oo ciidamo Mareykan ah ku sugan yihiin, ay yihiin arrin ka duwan.
Sida uu sheegay mas’uul Mareykan ah oo xog-ogaal ah, kaas oo wargeyska u warramay shuruud ah inaan magaciisa la shaacin, falanqeeyeyaasha milatariga ayaa soo gabagabeeyay in diyaaradahaas ay u badan tahay inay ahaayeen kuwo hawl-ilaalin ah oo ay dowlad maalgelisay. Warbixinta wargeyska Mareykanka ayaa sidoo kale sheegtay in mas’uuliyiin milateri oo British ah iyo Jarmal ah ay diideen inay ka hadlaan arrintaas.
