29 qof oo rayid ah ayaa ku dhintay Axaddii weerar duqeyn ah oo lagu qaaday saldhig shidaal ku yaalla goob ku taal koonfurta caasimadda Suudaan ee Khartoum, halkaas oo ay gacanta ku hayso ciidamada taageerada degdegga ah (RSF).
Sida laga soo xigtay u doodayaasha xuquuqda aadanaha oo la hadlay wakaaladda wararka ee Jarmalka (DPA), weerarka oo ay fulisay diyaarad aan duuliye lahayn ayaa ka dhacay suuqa oo aad u camirnaa, halkaas oo saldhigga shidaalku ku yaallay. Weerarka ayaa sidoo kale sababay dhaawaca dad badan.
Markhaatiyaal ayaa sheegay in duqeynta ay keentay qaraxyo waaweyn iyo dab qabsaday dhowr goobood.
Sida laga soo xigtay wakaaladda wararka ee Jarmalka, koonfurta Khartoum, gaar ahaan xaafadaha Mayo iyo Al-Azhari, waa aagag ay RSF maamusho, halkaas oo ay ku yaallaan suuqyo ay ku iibiyaan alaabaha laga soo xaday guryaha ay ka tageen dadka ku barakacay dagaallada.
Ma jirto cid sheegatay mas’uuliyadda weerarka, kaas oo qayb ka ah colaadda dhiigga badan ku daatay ee u dhaxaysa ciidamada milateriga Suudaan iyo kuwa taageerada degdegga ah tan iyo bishii Abriil 2023. Colaaddan ayaa sababatay dhimashada in ka badan 27,120 qof iyo barakaca ku dhawaad 14 milyan oo qof oo gudaha iyo dibadda Suudaan ah, sida ay ku qiyaaseen hay’ado caalami ah.
Khartoum, Senja, iyo Darfur
Sida laga soo xigtay wakaaladda wararka ee Faransiiska (AFP), ciidamada milateriga ee uu hoggaamiyo Abdel Fattah al-Burhan ayaa guulo ka gaaraya dagaalka si ay dib ugu qabsadaan caasimadda Khartoum oo ay RSF maamusho, iyaga oo u socda sidii ay dib ula wareegi lahaayeen magaalada. RSF waxaa hoggaamiya Maxamed Xamdan Daqlo oo loo yaqaan “Hemeti”.
Bilowgii dagaalka, RSF ayaa si buuxda ula wareegtay Khartoum, taasoo ku qasabtay dowladda Suudaan inay xarun ku meel gaar ah ka samaysato magaalada Bortusudan oo ku taalla Badda Cas.
Wakaaladda Faransiiska ayaa sidoo kale sheegtay in ciidamada milateriga Suudaan ay dhowaan dib ula wareegeen magaalada Senja, oo ah caasimadda gobolka Sennar oo koonfurta Khartoum ku taal, taas oo shan bilood gacanta ugu jirtay RSF. Waxaa loo arkaa guul istaraatiiji ah maadaama magaalada ay ku taallo waddo muhiim ah oo isku xirta bariga iyo bartamaha Suudaan ee ay milaterigu maamulaan.
Dhanka kale, RSF ayaa inta badan qabsatay dhulalka gobolka Darfur ee galbeedka dalka, waxayna sii wadaan inay ku soo siqaan koonfur-bari dalka, oo uu hadda milaterigu gacanta ku hayo.
