Ciidanka Lubnaan ayaa maanta, Khamiis, ku dhawaaqay in ciidamada Israa’iil ay ku soo xadgudbeen dhowr goobood oo koonfurta dalka ah, taas oo ah jabin cusub oo lagu sameeyay heshiiska xabbad-joojinta iyo weerar cad oo ka dhan ah madaxbannaanida Lubnaan. Ciidanka Lubnaan ayaa war-saxaafadeed ku sheegay in ciidamada Israa’iil ay galeen deegaannada Qanṭara, Cadshit Al-Qusayr, iyo Wadi Al-Hujayr, iyagoo caddeeyay in ciidanka Lubnaan ay halkaas ku xoojiyeen joogitaankooda iyo in xaaladda si dhaw loola socdo iyadoo lala kaashanayo ciidamada ku-meel-gaarka ah ee Qaramada Midoobay ee Lubnaan (UNIFIL).
Ciidanka Lubnaan ayaa sidoo kale sheegay in ciidankoodu ay xireen waddooyinka aada Wadi Al-Hujayr sababo la xiriira dhaqdhaqaaqyada Israa’iil. Taliska guud ee ciidanka ayaa xaqiijiyay in xaaladda lala socdo iyada oo lala kaashanayo UNIFIL iyo guddiga shanta geesoodka ah ee loo xilsaaray fulinta heshiiska xabbad-joojinta.
Wakaaladda wararka Lubnaan ayaa hore u sheegtay in gaadiid milatari oo Israa’iil leedahay ay ku soo gudbeen Wadi Al-Hujayr ilaa ay gaareen degmada Qanṭara, halkaas oo ay si weyn u fureen rasaas inta ay wadeen hawlgallo baaritaan ah, taas oo khasabtay dad badan oo deegaanka ah inay u barakacaan degmada Ghandouriya ee ku dhow.
Wakaaladdu waxay sidoo kale sheegtay in tirada jebinta heshiiska xabbad-joojinta ee ay Israa’iil sameysay ay ka badatay 300 tan iyo markii uu dhaqangalay heshiisku 27-ka Nofeembar, taas oo sababtay dhimashada 32 qof iyo dhaawaca 38 kale.
