Ilo wareedyo Falastiiniyiin ah oo ku sugan xeryaha qaxootiga ee Jenin ayaa maanta oo Sabti ah u sheegay Al-Jazeera in hay’adaha amniga ee Maamulka Falastiiniyiinta ay saareen go’doon adag xeryaha qaxootiga ee ku yaal waqooyiga Daanta Galbeed, iyagoo ka hor istaagay inay galaan agabka cuntada iyo dawooyinka.
Sidoo kale, ilo-wareedyadu waxay sheegeen in biyaha iyo korontaduba ka go’een qaybo badan oo ka mid ah xerada sababo la xiriira go’doonka.
Waxay intaas ku dareen in hay’adaha amniga ee Maamulka Falastiiniyiinta ay xireen tiro ka mid ah dhaawacyada iyo bukaanada xeryaha qaxootiga ee Jenin iyagoo ku sugnaa isbitaalada, sidoo kalena ay u jeediyeen hanjabaado saxafiyiinta si ay uga joojiyaan tebinta dhacdooyinka ka socda gudaha xeryaha iyo in laga hor istaago gelitaanka halkaas.
Tan iyo bishii hore, ciidamada ammaanka ee Falastiiniyiinta waxay sii wadeen hawlgal ciidan oo ka socda xeryaha qaxootiga ee Jenin iyagoo ku andacoonaya inay baacsanayaan waxa ay ugu yeereen “dembiilayaasha.” Dhanka kale, ururo Falastiini ah – oo ay ku jiraan Xamaas, Jabahadda Shacabka, iyo Jihadka Islaamiga – waxay ku eedeeyeen ciidamada ammaanka ee Maamulka Falastiiniyiinta inay dabagal ku hayaan kuwa iska caabinta ah.
Iskahorimaadyadaas waxay sababeen dhimashada 6 ka mid ah ciidamada ammaanka iyo 8 qof oo rayid ah, oo uu ku jiro mid ka mid ah hogaamiyeyaasha katibada Jenin.
Sida ay sheegeen dadka deegaanka, ciidamada ammaanka ee Maamulka Falastiiniyiinta waxay amar ku siiyeen saldhigyada shidaalka ee gobolka inaysan u gudbin wax shidaal ah xeryaha qaxootiga ee Jenin.
Sidoo kale, dadka ku nool xeryaha ayaa ku eedeeyay ciidamada ammaanka inay rasaas ku fureen matoorada waaweyn ee korontada keena, taasoo keentay inay gubtaan.
