Wakaaladda wararka ee AP ayaa sheegtay in xaalad jahwareer ah ay ka taagan tahay gobolka New Jersey, halkaas oo diyaarado aan duuliyaha lahayn ama aan si rasmi ah loo aqoonsan lagu arkay iyagoo dul wareegaya cirka. Muuqaalo aad loogu faafiyay baraha bulshada intii lagu guda jiray fasaxa qaran ee (Thanksgivin), ayaa noqday dood qaran oo mas’uuliyiinta heer federaal iyo gobolba ay ka hadlayaan.
Warkan, oo markii hore kasoo shaac baxay warbaahinta maxalliga ah, ayaa hadda gaaray heer ay xubnaha Kongareeska iyo madaxda New Jersey ay sharaxaad dalbadeen. Madaxweynaha gobolka New Jersey, Phil Murphy, ayaa u qoray Madaxweyne Joe Biden isagoo ka codsaday jawaab ku saabsan arrintan. Senator Andy Kim ayaa isna bartiisa bulshada ku sheegay inuu waqtigiisa u huray raadraaca diyaaradahaas, isagoo sheegay in arintu u baahan tahay caddeyn.
Duqa Magaalada New York Eric Adams ayaa isna ku dhawaaqay in baaritaan lagu samaynayo dhacdooyinkan, iyadoo la sheegay inay jiraan muuqaallo muujinaya iftiin cirka ka muuqda oo dadka deegaanku ay qabaan inay yihiin wax aan caadi ahayn. Sidoo kale, madaxweynaha cusub ee Maraykanka, Donald Trump, ayaa ku baaqay in dowladda ay si cad u sheegto waxa socda, haddii kalena diyaaradaha la soo rido.
Ilaa hadda, ma jirto wax caddeyn ah oo ku saabsan waxa ay yihiin diyaaradaha la arkayo. Dadka qaar ayaa rumaysan inay yihiin diyaarado caadi ah , halka kuwa kale ay ka shaki qabaan inay yihiin qalab sirdoon, makhluuqaad ka baxsan dunida, ama xitaa wax la xiriira dowladda hoose.
Mas’uuliyiinta gobolka iyo kuwa federaalka ayaa sheegay in aysan jirin wax khatar ah oo muuqata, balse dad badan oo degaanka ah ayaa weli walaacsan. Kooxo baraha bulshada ah ayaa arrintan uga doodaya, iyagoo soo bandhigaya muuqaallo iyo sawirro muujinaya aragtidooda.
Dad badan ayaa rumeysan in diyaaradaha la arkay ay yihiin qalab sirdoon oo ay adeegsanayaan dalal sida Ruushka, Shiinaha, ama Iiraan si ay u khalkhalgeliyaan amniga Maraykanka. Si kastaba ha ahaatee, ilaa iyo hadda lama oga waxa ay yihiin diyaaradahaas iyo cidda dhab ahaantii ka dambeysa. Xiisaha iyo shakiga arrintan ayaa sii kordhaya iyadoo la sugayo jawaabo rasmi ah oo ka imanaya mas’uuliyiinta.
