Kuuriyada Koonfureed ayaa sheegtay in deriskooda Waqooyi ay maanta, Talaado, ku ganacsadeen gantaallo riddo gaaban oo loo ganay dhanka Badda Japan. Khubaro ayaa tallaabadan u arkay farriin loo dirayo maamulka madaxweynaha la doortay ee Mareykanka, Donald Trump.
Gantaalladan ayaa lagu soo beegay booqashada Wasiirka Arrimaha Dibadda ee Japan, Takeishi Iwaya, uu ku joogay Kuuriyada Koonfureed si uu kulan ula yeesho mas’uuliyiin sar sare, isagoo ujeedkiisu ahaa xoojinta xiriirka labada dhinac kahor inta Trump aanu xilka dib ugu laaban toddobaadka soo socda.
Militariga Kuuriyada Koonfureed ayaa xaqiijiyey inay ogadeen in gantaallada riddo gaaban loo ganay dhanka Badda Japan, waxayna shaaca ka qaadeen in hay’adaha sirdoonka ee Kuuriyada Koonfureed iyo Mareykanka ay si dhow ula socdeen diyaarinta gantaalladaas oo ay ku raad joogeen tan iyo markii la ganay.
Waxay sidoo kale faahfaahiyeen in hawlgalku dhacay saacadda 9:30 subaxnimo (00:30 wakhtiga caalamiga ah ee GMT) meel u dhow aagga Gangye ee Kuuriyada Waqooyi, halkaas oo gantaalladu ku duuleen masaafo dhan 250 kiiloomitir ka hor inta aysan ku dhicin badda.
