Dowladda Kenya ayaa wafdi u dirtay Muqdisho maanta, iyagoo ujeedkooda ku sheegay xal u raadinta khilaafka u dhexeeya dowladda federaalka Soomaaliya iyo maamulka Jubbaland, oo muddo bilooyin ah taagnaa.
Wararka ay heshay Caasimada Online ayaa xaqiijinaya in wafdigaan ay yihiin ergo mataleysa Axmed Madoobe, kaasoo xaalad caafimaad awgeed doonaya inuu safar dibadda ah ku baxo, isagoo ku sugan magaalada Kismaayo.
Wafdiga ayaa la kulmay Ra’iisul Wasaare Xamsa, waxayna ka codsadeen dowladda federaalka in loo fasaxo Axmed Madoobe safar caafimaad oo dibadda ah. Si kastaba ha ahaatee, dowladda federaalka ayaa codsigaas diiday, iyadoo horey cunaqabateyn ugu soo rogtay maamulka Jubbaland.
Sida ay wararku sheegayaan, diyaaradda ka qaadi lahayd Axmed Madoobe Kismaayo waa inay marka hore ka soo degto Muqdisho, taas oo sababtay in Axmed Madoobe uu ergo u soo dirsado dowladda si loo ogolaado safarkiisa caafimaad.
Dowladda federaalka ayaa sidoo kale maanta gabi ahaanba joojisay diyaaradihii rakaabka caadiga ah ee u kala gooshayay Kismaayo, Doolow, iyo magaalooyinka kale ee Jubbaland. Go’aankaas ayaa lagu sheegay inuu ka dhashay fal shalay ka dhacay Kismaayo, oo diyaaradda shirkadda Halla Airlines lagu qasbay inay ciidamo iyo masuuliyiin Jubbaland ah geyso degmada Doolow.
Xayiraadda cusub ayaa saameyn ballaaran ku yeelatay dadka rayidka ah ee Jubbaland, waxaana sidoo kale ay culeys weyn ku tahay madaxda maamulka Jubbaland, gaar ahaan Axmed Madoobe, maadaama aysan jirin wadooyin dhulka ah oo isku xira magaalooyinka Jubbaland sababo la xiriira goobaha ay Al-Shabaab gacanta ku hayaan. Tani waxay muhiim ka dhigtay safarrada diyaaradaha.
Xogtu waxay tilmaameysaa in xaaladda caafimaad ee Axmed Madoobe sii xumaaneyso, iyadoo laga horreysiiyay warar sheegaayey inuu muddo dheer xaalad caafimaad la tacaalayey. Dhibaatada ugu weyni waxay soo baxday wixii ka dambeeyay markii uu ka baxay shirkii ugu dambeeyay ee golaha wadatashiga qaranka, halkaasoo uu ka dhashay khilaaf xooggan oo isaga iyo dowladda federaalka u dhexeeya, taasoo keentay in aysan suurtagal u noqon inuu dibadda safarro caafimaad ku aado.
