Wariyaha Al-Jazeera ayaa sheegay in Injineer Maxamed Al-Bashiir, oo ah Ra’iisul Wasaaraha Dowladda Badbaadinta ee Suuriya oo maamuleysay Idlib sanado badan, la filayo in loo magacaabo Ra’iisul Wasaaraha cusub ee Suuriya si uu u hoggaamiyo marxaladda kala guurka.
Arrintan ayaa timid ka dib kulan ay isugu yimaadeen hoggaamiyaha howlaha mucaaradka hubeysan Axmed Al-Sharac, Al-Bashiir, iyo Ra’iisul Wasaarihii hore ee dowladda nidaamka Maxamed Al-Jalali, kaasoo lagu magacaabay inuu sii wado hawlaha xukuumadda.
Wa kuma Maxamed Al-Bashiir?
Ra’iisul Wasaaraha cusub ee la filayo in lagu dhawaaqo magacaabistiisa ayaa ku dhashay gobolka Idlib sanadkii 1983. Wuxuu haystaa shahaadada Injineernimada korontada iyo elektaronigga, oo uu ka qaatay jaamacadda Xalab qeybta isgaarsiinta (2007), iyo shahaadada shareecada iyo xuquuqda oo uu ka qaatay Jaamacadda Idlib (2021). Wuxuu soo noqday Agaasimaha Arrimaha Ururada, ka dibna wuxuu noqday Wasiirka Horumarinta iyo Arrimaha Bini’aadannimada ee Dowladda Badbaadinta ee kacdoonka Idlib sanadkii 2022.
Kulamo lala yeeshay waftiyada diblomaasiyadda
Dhanka kale, shirar xoogan ayaa socda oo u dhexeeya maamulka arrimaha siyaasadda ee mucaaradka iyo waftiyada diblomaasiyadda ajaanibta si looga wada hadlo xaalada amniga iyo siyaasadda Suuriya ka dib markii nidaamka Al-Asad la riday.
Maamulka arrimaha siyaasadda ee Dimishiq ayaa u sheegay Al-Jazeera inay ka shaqeyn doonaan sidii loo abuuri lahaa jawi nabdoon oo lagu soo dhaweeyo dadka Suuriyaanka ah ee dib ugu soo laabanaya dalkooda. Waxay ugu baaqeen Suuriyaanka qaxay inay dalka ku soo noqdaan oo ay ka qeyb qaataan dib-u-dhiska Suuriya.
