Jude Bellingham ayaa ka hadlay isbeddellada muhiimka ah ee ciyaartiisa oo u sahlay inuu soo dhammaystiro bisha November si heer sare ah.
Xiddiga xulka qaranka England ayaa la daalaa dhacayay dhaawacyo yar yar bilowgii xilli-ciyaareedkan, balse hadda wuxuu kusoo laabtay qaab ciyaareedkiisii ugu fiicnaa.
Bellingham ayaa laba gool ka dhaliyay La Liga bishii November, waxaana loo magacaabay xiddiga bisha ee Los Blancos, iyadoo qaab ciyaareedkiisa wacan uu sii socdo ilaa December.
Xiddigii hore ee Borussia Dortmund ayaa hadda lix gool ka gaaray dhammaan tartamada, iyadoo sidoo kale uu furay koontadiisa goolasha Champions League.
Real Madrid waxay u baahan tahay in Bellingham uu kusoo laabto qaab ciyaareedkiisii ugu sarreeyay, waxaana laacibkani uu shaaca ka qaaday sida isbeddello yaryar ay saameyn ugu yeesheen waxqabadkiisa.
“Waxaan si weyn u horumaray qaab ciyaareedkayga bishan, waana wanaagsan tahay in la i aqoonsado,” ayuu yiri sida laga soo xigtay Mundo Deportivo.
“Waxaan diiradda saarayaa caqabadaha soo socda. Waxa imanaya inta ka harsan xilli-ciyaareedkan waa muhiim. Waxaan hadda dhalinayaa goolal badan, si fiican ayaan u ciyaarayaa, waana isku kalsoonahay.”
Bellingham ma muuqato inuu gaari karo tirada 23-ka gool ee uu ku dhaliyay xilli-ciyaareedkiisii ugu horreeyay ee Madrid, laakiin wuxuu u badan yahay inuu gaari doono tobban gool marka la gaaro bilowga 2025, haddii qaab ciyaareedkiisa wanaagsan uu sii socdo.
