Madaxweynaha Mareykanka Joe Biden ayaa soo saaray istaraatiijiyad la sugayay muddo dheer oo lagula tacaalayo nacaybka ka dhanka ah Muslimiinta iyo Carabta, kaasoo si weyn u kordhay tan iyo markii uu qarxay dagaalka ka socda Gaza, isaga oo ku baaqay in la iska kaashado la dagaallanka takoorka.
Istaraatiijiyaddan oo ka kooban 64 bog ayaa la daabacay toddobaadyo ka hor inta aan xilka la wareegin madaxweynaha la doortay Donald Trump, kaasoo xilligii maamulkiisii hore soo rogay mamnuucid safar oo ka dhan ah muwaadiniinta qaar ka mid ah waddamada Muslimka ah, taas oo Biden uu ka qaaday maalintii ugu horreysay ee uu xafiiska qabtay.
Istaraatiijiyaddan ayaa la mid ah istaraatiijiyad ballaaran oo looga hortagayo waxa loogu yeero “nacaybka Yuhuudda” oo Aqalka Cad uu soo saaray Sebtembar 2023. Waxa kale oo ay timid in ka badan hal sano kadib dilkii wiil yar oo Muslim ah oo la oran jiray Wadea Al-Fayoumi (6 jir), kaasoo lagu tooriyeeyay nin bartilmaameedsaday isaga iyo hooyadiis sababtoo ah inay ahaayeen Muslimiin Mareykan ah oo asal ahaan Falastiin ka soo jeeda.
Hordhaca istaraatiijiyadda, Biden wuxuu ku tilmaamay weerarka lagu qaaday Wadea iyo hooyadiis inuu ahaa “arrin naxdin leh,” isagoo sidoo kale sheegay in kororka dambiyada nacaybka ka dhanka ah Muslimiinta iyo Carabta, takoorka iyo cagajuglaynta ay yihiin wax khaldan oo aan la aqbali karin.
Biden wuxuu qoray, “Muslimiinta iyo Carabta waxay xaq u leeyihiin inay ku noolaadaan karaamo iyo inay helaan dhammaan xuquuqaha si buuxda, sida dhammaan dadka Mareykanka ah.”
Wuxuu sidoo kale ku daray, “Siyaasadaha horseeda takoorka bulshada oo dhan waa khalad mana xaqiijiyaan nabadgelyadeenna.”
Dhanka kale, Golaha Xiriirka Mareykanka iyo Islaamka (CAIR) ayaa istaraatiijiyaddan ku tilmaamay mid “aan ku filnayn oo aad u soo daahday.”
Golaha, oo ah ururka ugu weyn ee u dooda xuquuqda madaniga iyo bini’aadanimada Muslimiinta Mareykanka, ayaa Aqalka Cad ku dhaliilay inuusan baabi’in liiska ilaalinta federaalka iyo liiska “mamnuuca duulimaadka” oo ay ku jiraan dad badan oo Mareykan ah oo asal Carab iyo Muslim ah leh.
Kooxda Trump ee xilwareejinta ayaan wax jawaab ah ka soo saarin istaraatiijiyadda.
Trump oo taageero ka helay qaar ka mid ah codbixiyeyaasha Muslimiinta ee ka careysan taageerada Biden ee dagaalka Israa’iil ku qaaday Gaza ayaa sheegay inuu diidi doono qof kasta oo “su’aal ka keena xaqa Israa’iil ay u leedahay jiritaanka,” isla markaana uu kansali doono fiisaha ardayda ajnabiga ah ee “ka soo horjeeda Yuhuudda.”
