Wasiirka Amniga Gudaha ee Xukuumadda Federaalka Soomaaliya, General Cabdullaahi Sheekh Ismaaciil (Fartaag), ayaa maanta si rasmi ah uga furay magaalada Muqdisho shir muhiim ah oo looga hadlayay horumarinta wejiga labaad ee Barnaamijka Wadajirka Booliska (Joint Police Programme – Phase 2, JPP2).
Shirkan oo diiradda lagu saaray qorshaha sanadka 2025 iyo miisaaniyaddiisa, ayaa waxaa si qoto dheer looga dooday hirgelinta iyo isku-duwidda barnaamijka, iyadoo loo marayo hab wada-shaqeyn iyo iskaashi.
Ugu dambeyntii, shirka ayaa lagu ansixiyay qorshaha sanadeedka Barnaamijka 2025 iyo miisaaniyaddiisa, taasoo qeyb muhiim ah ka ah dadaallada lagu xoojinayo amniga dalka iyo tayeynta Booliska Soomaaliyeed. Barnaamijkan ayaa la rajeynayaa inuu sare u qaado awoodda Booliska Soomaaliyeed si ay ugu adeegaan bulshadooda ugana jawaabaan baahiyaha amni ee ka jira dalka.
Shirka waxaa ka qeyb galay Wasiirro ka kala socday dowlad-gobolleedyada dalka iyo mas’uuliyiin kale oo heer Federaal ah, kuwaas oo dhamaantood isku raacay muhiimadda uu barnaamijkani u leeyahay xasilloonida iyo nabadgelyada dalka.
Dadaalladan ayaa qeyb ka ah qorshaha ballaaran ee dowladda ee lagu tayeynayo hay’adaha amniga si ay door muhiim ah uga qaataan soo celinta nabadda iyo kala dambeynta Soomaaliya.
