Wasiirka Maaliyadda Xukuumadda Federaalka Soomaaliya, Mudane Biixi Imaan Cige, ayaa maanta ka qeyb galay dood heerkeedu sareeyo oo lagu qabtay magaalada Casablanca, ee Boqortooyada Morocco, halkaas oo uu ka socdo Shirka Sanadlaha ah ee Maaliyadda Afrika (Africa Financial Summit).
Dooddan oo diiradda lagu saaray arrimaha deymaha iyo sidii dalalka gobolka u heli lahaayeen maalgalin waara ayaa waxaa ka soo qeyb galay Wasiirro Maaliyadeed oo ka kala socday dalalka Afrika iyo aqoonyahanno ku xeel dheer dhaqaalaha. Wasiirka Maaliyadda XFS ayaa khudbadiisa ku soo bandhigay waayo-aragnimada Dowladda Soomaaliya ee ku aaddan dariiqii ay martay hanaanka deyn cafinta ee HIPC, iyadoo uu sheegay in ay Soomaaliya hormuud u noqotay hannaankaas.
Mudane Biixi ayaa sharaxaad ka bixiyay dedaalladii Dowladda Soomaaliya ay u sameysay sidii ay uga gudbi lahayd dhammaan shuruudihii deyn cafinta, isagoo xusay in wasaaradda ay mudnaanta siiyay:
Sare u qaadidda dakhliga gudaha.
Dib-u-habeynta hey’adaha maaliyadda.
Hirgelinta nidaam hufan iyo maamul-wanaag maaliyadeed.
Waxaa kale oo Wasiirku caddeeyay sida Dowladda Soomaaliya uga go’an tahay in ay sii xoojiso nidaamyada dhaqaale ee dalka si ay u noqoto tusaale loogu daydo dalalka kale ee Afrikaanka ah ee la daalaa dhacaya deymaha culus.
Shirka ayaa ah mid fursad weyn u siinaya dalalka Afrika in ay isdhaafsadaan waayo-aragnimada iyo xalalka waara ee lagu xoojin karo koboca dhaqaalaha iyo maalgashiga gobolka.
