Lix dal oo xubno ka ah Midowga Yurub ayaa ku baaqay in si ku meel gaar ah loo hakiyo cunaqabataynta saaran Suuriya, gaar ahaan dhinacyada gaadiidka, tamarta, iyo bangiyada.
Warqadda oo ay saxiixeen Jarmalka, Faransiiska, Nederlaand, Isbayn, Finland, iyo Denmark, oo ay heshay wakaaladda wararka ee Reuters, ayaa sheegtay in Midowga Yurub “laga doonayo inuu si degdeg ah u bilaabo dib-u-habeynta nidaamka cunaqabataynta.”
Sidoo kale warqaddu waxay ka digtay in haddii aan la buuxin rajada Midowga Yurub ee ku aaddan ixtiraamka xuquuqda aadanaha iyo xuquuqda dadka laga tirada badan yahay, aan la qaadi doonin cunaqabataynta dheeraadka ah, islamarkaana dib loo soo rogi karo cunaqabataynta horey loo qaaday.
Lixda dal ee xubnaha ka ah Midowga Yurub waxay sheegeen in ururku uu cunaqabataynta ka qaado si loo fududeeyo duulimaadyada rayidka ah, dib loogu qiimeeyo cunaqabataynta saaran alaabaha qiimaha sare leh, meesha looga saaro mamnuucista dhoofinta tiknoolajiyada shidaalka iyo gaaska, iyo in dib loo furo xiriirka dhaqaale ee Midowga Yurub iyo Suuriya.
Waxay sidoo kale sheegeen in cunaqabataynta lagu soo rogay xubnaha maamulkii madaxweynihii xilka laga qaaday Bashar Al-Asad iyo taageerayaashiisa ay tahay inay sii jiraan.
Warqaddu waxay sheegtay in laga doodo qaadista cunaqabataynta laga saaray Hay’adda Tahrir Al-Sham heerka Qaramada Midoobay, iyadoo lala tashanayo saaxiibada dhow, iyadoo ku dartay in “taasi ay ku xirnaan doonto qiimeynta wadajirka ah ee hay’adda, hoggaankeeda Axmed Sharaac, iyo xaaladda ka jirta gudaha Suuriya.”
