Ilo ku dhow ciidamada Sudan ayaa u sheegay telefishinka Al-Jazeera maanta oo Jimco ah in xoogagga hore ee ciidamada ay galeen deegaanka Waddul-Ubeyd oo ku yaalla bariga magaalada Wad Madani, oo ah caasimadda gobolka Al-Jazeera ee bartamaha dalka.
Sidoo kale, ilo ciidan ayaa hore ugu sheegay Al-Jazeera in ciidamada qalabka sida ee Sudan ay dib u qabsadeen deegaanka Ummul-Quraa oo ku yaalla bariga gobolka waaberigii hore ee maanta, kaddib dagaallo ay la galeen xoogagga taageerada degdegga ah. Waxay sheegeen in ciidamadu ay ku sii siqayaan magaalada Wad Madani iyaga oo ka socda dhawr jiho.
Maalmihii u dambeeyay, ciidamada Sudan waxay dib u qabsadeen magaalooyinka Al-Shabarga iyo Al-Hajj Cabdullaahi. Meelo qaarna, ciidamadu waxay u jiraan kaliya 20 km magaalada Wad Madani.
