Mucaaradka Suuriya ayaa xukunka ka tuuray nidaamka Bashar Al-Assad, iyagoo gudaha u galay caasimadda Dimishiq saacadihii hore ee Axaddii, kuna guuleystay inay si buuxda gacanta ugu dhigaan kaddib dagaallo kooban. Waxay sidoo kale maalmihii hore la wareegeen magaalada Xumus, iyagoo ka sii gudbayey dhanka Laadiqiya halkaasoo ay ku qabsadeen magaalada Jableh, iyo weliba Manbij oo ku taalla gobolka Aleppo, taasoo horey ugu jirtay gacanta xoogagga Kurdish-ka.
Dhanka kale, Ruushka ayaa Axaddii qirtay in Assad iyo qoyskiisa ay hadda ku sugan yihiin caasimadda Moscow, sida laga soo xigtay telefishinka rasmiga ah ee Ruushka oo sheegay in loo fidiyay magangelyo bini’aadannimo dartii.
Israel ayaa ka faa’iidaysatay xaalada qasan ee Suuriya iyadoo Axaddii duqaysay 100 goobood oo ku yaalla gudaha dalka Suuriya, sidoo kalena qabsatay deegaanka Jabal Sheikh oo ku dhow Buuraha jolaan. Kanaal Israeli ah ayaa sheegay in Israel ay sii wadi doonto bartilmaameedsiga xarumaha milateri ee Suuriya si looga hortago inay gacanta u galaan mucaaradka.
Dhanka siyaasadda, dalal dhowr ah oo ay ka mid yihiin Britain iyo Canada ayaa soo dhoweeyay in nidaamka Assad uu dhaco, waxaana sidoo kale soo dhoweeyay xoghayaha guud ee Qaramada Midoobay António Guterres iyo guddiga fulinta Midowga Yurub. Mareykanka ayaa ku baaqay in Assad lala xisaabtamo, iyagoo sheegay inay la xiriirayaan mucaaradka si loo hubiyo badqabka ciidamada Mareykanka ee ku sugan Suuriya iyo in laga hortago in xaaladda jirta ay ka faa’iidaystaan kooxda Daacish.
