Erayga “makuucuun” ayaa si weyn ugu faafay Suuriya ka dib burburka nidaamka Bashaar Al-Asad 8-da Diseembar ee sanadkan, taasoo keentay in madaxweynihii xilka laga tuuray uu u cararo Ruushka, halka mucaaradku ay gacanta ku dhigeen caasimadda Dimishiq. Haddaba waa maxay sheekada eraygan? Maxaase keenay inuu hadda soo shaac baxo?
Bilowgiiba, reer Suuriya waxay isticmaalaan erayga “Al-takwiic” ama “makuucuun” si ay ugu tilmaamaan dadka ka leexday mowqifkoodii hore iyagoo u wareegay dhinac ka soo horjeeda sidii hore, iyagoo ku xisaabtamaya xaaladda markaas taagan iyo danahooda shakhsiga ah. Maanta, eraygani waxa uu ku fiday in lagu magacaabo taageerayaashii nidaamkii la riday ee Bashaar Al-Asad oo si dhaqso leh ugu wareegay taageerada kacdoonka Suuriya iyo dowlad cusub oo ka dhalatay Dimishiq, si xawli ah oo xitaa ay ku noqdeen tartamayaal mucaaradka qudhooda ah.
Waxay mucaaradka ku yaabka ku noqotay sida ay taageerayaashii Asad si buuxda uga leexdeen mowqifkoodii hore ee ku qotomay amaanta iyo difaaciisa, una beddeleen farxad iyo raynrayn ay ka muujiyeen bixitaankiisa iyo dhamaadka maamulkiisa. Waxa intaa dheer in qaar badan ay bilaabeen in ay Asad canaantaan oo xitaa caayaan, inkasta oo ay mar ahaan jireen taageerayaashii ugu adag ee dagaalkiisa ka dhanka ahaa kacdoonka iyo taageerayaashooda.
Iyagoo ka faalloonaya isbeddelka degdegga ah ee mowqifka taageerayaasha Asad, qaar ka mid ah dadka baraha bulshada isticmaala ayaa yiri: “Qaar ayaa eray cusub ku dhawaaqay oo lagu tilmaamay koox makhluuqyo nool ah oo la yiraahdo (makuucuun), taasoo loola jeedo kuwa beddela dhinacooda 180 darajo.”
Balse xaqiiqada dhabta ah, dadkaas “makuucuun” waa makhluuqaadkii ugu daacadsanaa ee dunida oo mowqifkoodu aanu weligood is beddelin, xitaa haddii ay is beddelaan dhacdooyinka ku wareegsan. Waxay had iyo jeer ka taagan yihiin hal calaamad oo cad oo ay dadka oo dhan arki karaan: “Soo dhawoow madaxweynaha cusub.. waannu kuu ballan qaadaynaa daacadnimo aan xad lahayn,” calaamad taasoo ku habboon in la isticmaalo wakhti kasta iyo goob kasta.
Qaar kale oo baraha bulshada wax ku qoray ayaa yidhi: “Makuucuun waa eray cajiib ah oo ka yimid lahjadda Shaamiga, waxaana lagu tilmaamaa kuwa xawaare aan caadi ahayn uga tallaaba dhinac jabtay oo ku biira dhinac xoog yeeshay. Makuucca waa qof aan ku guulaysan karin xilligan casriga ah ee lagu keydiyo faahfaahinta mowqif kasta oo qof uu qaato.”
