Kooxda Manchester United ayaa guul cajiib ah ka gaartay dariskooda Manchester City, kadib markii ay 2-1 ku garaaceen ciyaar xiiso leh oo lagu qabtay garoonka Etihad, taasoo qayb ka ahayd wareegga 16-aad ee Horyaalka Premier League.
Qaybta Hore
Manchester City ayaa hoggaanka qabatay daqiiqaddii 36-aad, kadib kubad uu madax teesto ah uu shabaqa ku hubsaday Josko Gvardiol, kaddib kubbad laad gees ahayd oo si qurux badan u soo qaaday. Ciyaarta qaybta hore waxa ay ku dhammaatay 1-0 ay City ku gacan sarreysay, iyadoo United aysan wax fursad weyn ah sameynin marka laga reebo kubbad uu Amad Diallo ku shuuday shabaqa, taasoo hareer martay birta.
Qaybta Labaad
Manchester United ayaa si xooggan u bilaawday qaybta labaad, iyagoo fursado dhowr ah iska lumisay, gaar ahaan kubbad uu Bruno Fernandes si dirqi ah u hareer mariyay shabaqaa. Daqiiqaddii 88-aad, qalad halis ah oo uu sameeyay Matheus Nunes oo kubbad gaaban u celiyay goolhayaha Ederson ayaa u saamaxday Amad Diallo inuu rigoore ka keeno kaddib markii gudaha xerada ganaaxa lagu riday.
Bruno Fernandes ayaa rigooradaas u beddelay gool, taasoo ciyaarta ka dhigtay barbaro 1-1 ah. Daqiiqadihii ugu dambeeyay, Amad Diallo ayaa mar kale soo baxay, isagoo si farsamaysan u dhaafay Ederson, kaddibna kubbad sare ugu toogtay shabaqa, taasoo ay difaacyada City ku guuldarreysteen inay iska saaraan kahor intaysan shabaqa galin.
Tababaraha City, Pep Guardiola, ayaa si lama filaan ah u ciyaarsiiyay Matheus Nunes booska daafaca bidix isagoo isticmaalay nidaamka (4-1-4-1), halka macallinka United, Ruben Amorim, uu go’aansaday inuu ka reebo liiska ciyaartoyda Marcus Rashford iyo Alejandro Garnacho, isagoo diiradda saaray difaac adag iyo weerarro degdeg ah.
Guushan ay gaartay Manchester United ayaa cadaadis cusub ku sii kordhisay kooxda Guardiola, taasoo xaalada City uga sii daraysa tartanka adag ee horyaalka.
